Propuestong Draft Bill Para Sa Linderos Kan Mga Kabubuldan Sa Bicol Matatapos Na

Sa laog kan semanang ini matatapos an enterong propuestong lakdang o draft bill para sa Forestland Boundary Delineation kan gabos na kabubuldan sa Rehiyon Bicol, matapos pa an komprehensibong survey kan Regional Assessment and Delineation Team kan Land Evaluation Party (LEP).

Sosog kay D-E-N-R Regional Executive Director Joselin Marcus Fragada, nahimo na an lima (5) na draft bill para sa mga probinsiya nin Albay, Catanduanes, Camarines Norte, Camarines Sur asin Sorsogon. Kaubay sa mga draft bill an pinalmenteng linderos nin mga kabubuldan sa limang probinsiya na sa kagabsan namugtak sa 3,338.484 kilometro kwadrado (km2).

Segon sa director, nababanga an mga linderos sa minasunod; Albay - 302.446 km², Catanduanes - 347.966 km², Camarines Norte - 781.637 km², Camarines Sur - 1537.938 km², dangan Sorsogon - 368.495 km².

Sinabi ni Director Fragada na igwa man nin nagkapirang parcela ki lote an naipa-irarom sa conversion sa Alienable and Disposable Land na maabot sa 91.7408 km², mantang an naiproceso sa reversion sa timberland, maabot sa 8.13 km².

Mientrastanto, ipig-sierto ni RED Fragada na matatapos sa laog nin semanang ini an draft bill para sa probinsiya nin Masbate despues isusumitir sa National Assessment And Delineation Committee (NADC) para sa magkakanigong disposisyon.

Broadcast Release: January 11, 2012