Barangay Forest Program (BFP) sa Albay, padagus na nadadagdagan an bilang nin mga recepienteng barangay

Suminakat na sa 216 bilang nin mga barangay sa Albay an mabibinipisyuhan kan Barangay Forest Program (BFP), pigkukunsiderar na pinakadakulang reforestation program sa barangay na formal na piglansar sa probinsya kan marso 7, 2015. Pigpapahidale naman ni DENR Regional Director Gilbert C. Gonzales an pagpaluwas nin mobilization fund sa gabos na barangay na masasakop kan programa na may 15% kan total project cost ngani na maka abante na an mga brgy sa mga aktibidad sa pag implimentar kan proyekto lalo na sa seedling production. Sa ngunian, maabot na sa 949,719 seedlings an natipon kan mga recepienteng barangays para sa outplanting sa pag abot nin tag uran. Padagus paman  an technical team kan DENR, compowesto nin mga Forest Extension Officers, sa pag determinar asin assessment  nin  mga lugar o barangay  na suitable para sa bfp ta ngani man na maabot an kabilogan na target na 1,614 ektarya  sa Albay.

Target kan programang BFP an mga barangay na may lugar na sadire kan LGU, kataning na salog asin sapa, communal forest/watershed, open & denuded forestland asin iba pa na suitable lands. An mga klase nin kahoy o commodity para sa programang eyu an   fruit-bearing trees, mangrove, bamboo asin iba pa. Susog  sa kasunduan, pupondohan  kan denr an enot na taon para sa implementasyon kan program mantang sisimbagun naman kan recepienteng barangay. An pagmantiner kan mga pananum sa panduwa asin pantulong taon na tatawan nin alokasyon hale sa ira kan barangay.

Segun pa ki DENR Regional Director Gilbert C. Gonzales, an Bfp sarung lakdang kan DENR kapartner an DILG  bilang suporta sa National Greening Program, sarung priority program  kan National Government na may toyo  na makapagtanum nin 1.5 billion kahoy sa 1.5 million ektarya nin kadagaan. Ini kasunod man kan  pigpirmahan na kasunduan sa pagultanan kan DENR asin Provincial Government of Albay kan nagtalikod na taon para mapadakul  an  kakahuyan sa probinsya baku sana man sarung paagi sa pag address sa climate change kundi proteksyon kan probinsya sa panahon nin kalamidad.

An BFP piga-implementar man sa Ilocos asin Davao Del Sur bilang pilot sites.

Broadcast Release: March 26, 2015