Programa Sa Coastal Resources Management Nagtao Nin Benepisyo Sa Masbate

Pormal nang tinapos kan Department of Environment and Natural Resources an Integrated Coastal Resources Management Project o I-C-R-M-P, sarong pitong-taon na programa na nakatabang para mapakusog an sustenableng palakaw buda pangangataman kan mayaman na marine biodiversity o mga buhay-ilang sa kadagatan, siring man matakrasan an kapagtiosan kan mga lokal na parasira partikular na sa probinsiya kan Masbate. 

An nasabing programa an nagtulod kan konseptong “ridge-to-reef’ sa pagpalakaw kan mga rekursong baybayon asin madugangan an ganansiya kan mga parasira sa paagi kan pagtatao sainda nin mas dakulang oportunidad pangkabuhayan. 

Sa kabikolan, an islang probinsiya kan masbate an saro sa mga napiling lugar na ipa-irarom sa I-C-R-M-P, kun saen sarong syudad asin 16 na mga munisipyo an nakakuang benepisyo sa lindong kan proyekto na ipina-otob poon kan taon 2007 sagkod 2014. 

An proyektong ICRMP sa Masbate may nagkapirang komponente, sa enot na komponente - pagpakusog kan palisiya asin institusyon - na nakatotok sa pagpalangkaw kan partisipasyon kan man-iba-ibang mga stakeholder, pagtagama nin pondo asin pagpakusog nin kapabilidad. Kaubay sa pag-aadal kan palisiya an pagtungkos sa mga isyu kan pagmamanehar kan mga bakhawan,  mga peligro sa mga baybayon asin kapalibutan. 

An pangduwang komponente, na nakatotok sa biodiversity conservation, an aspeto nagtungkos sa proteksyon asin pagpalangubo liwat kan mga bahura o coral reef, mga bakhawan asin watershed, asin padakulon an banhi nin mga sira. An I-C-R-M-P nakamukna asin nagpakusog nin 9 na marine protected areas o santwaryo nin mga sira na may kabilogan na hewas na maabot sa 5,600 ektarya siring man an pagmukna nin Regional Information Center o R-I-C sa probinsiya. 

Saro pang komponente kan proyekto iyo an enterprise development asin pakusogon an kabuhayan kan mga lokal na parasira , tinukduan kaini an mga stakeholder lalo na an mga komunidad na dugangan an saindang delensya asin makatindog sa saindang sadiri  sa paagi kan pagmukna nin ecotourism asin iba pang kabuhayan arug kan culinary enterprise. 

An panghudyan na komponente iyo an pagtatabang sa mga gobyerno lokal na magpili nin mga pangsosyedad asin pangkapalibutan na serbisyo o mga pasilidad arog kan Water Supply/System Project sa Palanas, Fisherman’s Federation Complex  sa San Pascual asin municipal wharf o pantalan sa Mobo.

Broadcast Release: December 15, 2014