Bagong Sistema Sa Pinakaskas Na Pagtitulo Nin Daga Pigtungkusan Sa Sarong Workshop

Mas maparirikas an pagtitulo nin daga sa paagi kan bagong sistema sa Public Land Titling na pinagtutulod kan Department of Environment and Natural Resources (D-E-N-R) sa paagi kan Land Management Bureau (L-M-B).

An siring na bagay an pinagtungkosan sa sarong workshop na pinagpartisiparan kan mga personahe kan D-E-N-R Bicol asin mga field office kaini na imbuwelto sa Land Administration and Management, kairiba man an mga focal person o opisyal kan mga gobyerno lokal na may mandato sa pag-maneha kan mga daga. 

Tinawan nin doon ni L-M-B Director Ralph Pablo na an sistema kan pag-mainstream kan pagtititulo nin daga saro sa pangenot na inisyatiba kan gobyerno tanganing mas matawan nin kaseguruhan an mga namamanwaan sa saindang pagsadiring mga daga, laen pa kaini an karahayan na dulot sa buwis na mapapaduman sa mga L-G-U. 

Sa saiyang pahayag, sinabi ni Pablo na an inisyatiba sa Administrative Confirmation of Imperfect Title o sa madaling sabi libre o free patent naipa-otob na sa mga napiling lugar sa Pilipinas arug kan probinsiya nin Bohol sa kabisayaan, na kun saen kadakul na namamanwaan an nakakua nin pakinabang sa free patent. 

Sa lindong kan inisyatiba, mas mapapahalipot an peryodo kan imbestigasyon asin resolusyon kan mga free patent sa rason na tatawan nin dalan an Alternative Dispute Resolution o A-D-R, o an pagbibisay kan mga sirintikan sa daga sa paagi kan paghururun sa barangay.

Sa arug kaining paagi, sinabi ni Director Pablo na mapapadali na an proseso kan pagtatao nin free patent sa mga kwalipikadong residente na may marhay na bunga para sa mga lokal na gobyerno lalo na sa lado kan Rentas Internas. 

Kasabay kaini, nangapudan man si L-M-S Regional Technical Director Pedro Noble sa mga namamanwaan na kun isi nindang kwalipikado sinda na magsumite nin aplikasyon para sa free patent, magpasiring sa mga Community Environment And Natural Resources Office (CENRO) sa saindang lugar para matabangan sa libreng titulo nin daga hale sa gobyerno.

Broadcast Release: December 8, 2014