DENR, Birdwatchers Nagkasundo Para Sa Pangataman Kan Mga Lagalag Na Bayong

Nangapudan an Department of Environment and Natural Resources sa publiko na imbis badilon an mga bayong, mas marahay na kuanan na sana an mga ini nin retraro.

Pinagiromdom ni Environment Sec. Ramon Paje an pangangaipo para protehiran an mga bayong kan nasyon, kaurubay na an mga dayo o migratory bird dahilan kan saindang mahalagang papel sa pagbalanse kan kapalibutan.

Saiyang sinabi na sa ngonyan nagkasundo an D-E-N-R asin an Wild Bird Club of the Philippines (W-B-C-P) na iligtas asin bantayan an gabos na mga tubuanon o native na bayong.

Sa lindong kan kasunduan, susuportahan buda matabang an W-B-C-P an mga lakdang kan D-E-N-R sa pangataman  kan mga bayong sa paagi kan pagheras kan kaaraman asin tibay kan mga miyembro kan grupo sa aspeto kan bird photography.

Tinawan nin punto kan Environment Secretary na an bird photography sarong daeng kapadis na inisyatiba sa pangataman - ini dahil ta aasintahon an mga bayong sa paagi nin camera imbes na badil.

Sa kabikolan, nagdadakul naman an mga birdwatcher na nagsusuporta sa mga inisyatiba kan D-E-N-R Bicol sa pag-aataman kan mga wetlands na ineerokan kan mga tubuanon  asin dayong bayong. Poon ngonyan na panahon sundo sa bulan nin Marso nagdadagsaan an mga migratory bird sa mga wetland area kan kabikolan partikular sa Cabusao Wetlands sa probinsiya kan Camarines Sur.

Broadcast Release: November 27, 2014