Cadastral Survey Sa Bicol Nagkakanigong Matatapos Bago An Taon 2016

An Department of Environment and Natural Resources (D-E-N-R) Bicol pusog an pagtubod na mahahaman an Cadastral Survey sa bilog na rehiyon, para sa 107 na banwaan asin 7 syudad sundo sa taon 2016.

Ini an tinawan asegurasyon ni Regional Technical Director Pedro Noble, pamayo kan Land Management Service sa pagsasabing nasa tamang talaan pa man an ahensya asin may 54 nang aprubadong cadastre an rehiyon kan taon 2006.

Sa saiyang pahayag, sinabi ni R-T-D Noble na sa ngonyan, igwa nin 34 cadastral survey na isinasagibo an L-M-S na kun saen, sa kabilogan na bilang 30 kaini an pinagtagamahan nin pundo sa taon 2014 asin an natatadang 4 continuing project kan taon 2013.

An cadastral survey may kamawotan na aramon an linderos asin nasasakopan na daga kan mga probinsiya, syudad asin banwaan kairiba naman an mga barangay, sa paagi kan political boundary o lot survey. Sa siring na paagi, nahihimo an lindero politikal sa pagultanan kan mga gobyerno lokal, na lyabe tanganing malikayan an sirintikan sa mga lote.

Laen pa digdi an pagtatagama nin tamang Internal Revenue Allotment o IRA kan lambang L-G-U, dugang pa an pag-aaram kan tamang sukol kan indibidwal na mga lote para mas madali na an pagdi-distrebwer nin land patents o titulo nin daga.

An Cadastral Survey Program nagpoon kan taon 1913 sa paagi kan pagsasaley kan Commonwealth Act No. 2259 o an Cadastral Act, na naemyendahan kan R-A 7160 o an Local Government Code kun saen na-devolve an cadastre sa mga L-G-U. Mantang kan taon 2001, naibalik liwat sa D-E-N-R an cadastral survey sa paagi kan Administrative Order no. 2001-23, kun saen itinao an mandato sa pagpa-otob, pagpalakaw asin pagmanehar kan nasabing proyekto.

Broadcast Release: November 14, 2014