Interfaith Dialogue Manongod Sa Climate Change Nagin Matrayumpo

Matrayumpong naisagibo kan manlaen-laen na grupong relihiyoso sa pangengenot kan Department of Environment and Natural Resources (D-E-N-R) Bicol an  Interfaith Dialogueon Climate Change sa Ateneo De Naga University, syudad kan Naga kan naka-aging Nobyembre 14, 2014.

Sa nasabing pagtiripon an mga pamayo kan iba-ibang relihiyon, sekta o kongregasyon, mga iskolar kan siyensya, eksperto kan gobyerno asin mga lokal na ehekutibo nagkaboronyog para sa sarong kamawotan, an pakikisumaro kan mga relihiyoso sa inisyatiba kan gobyerno sa Climate Change Adaptation.

Tampok sa pagtiripon an pagtungkos ni dating senador asin Commissioner Heherson Alvarez kan Climate Change Commission sa “Quest For Climate Justice”.

Sa saiyang pahayag, sinabi ni Alvarez na nasa delantera na an kinaban kan peligro na dulot kan climate change, asin kaipuhan na maghiro an pagabos para malabanan an marikas na pagbabago kan klima na iyo man an kawsa kan mga kalamidad sa satuyang nasyon.

Tinawan niya nin punto an polusyon dara kan aso na gikan sa mga behekulo asin mga industriya, an carbon dioxide na iyo an nagpaparikas kan global warming laen pa an labi-labing pagkonsumo sa mga rekurso natural.

Hinagyat niya an mga pamayo kan mga relihiyoso na magin madunong asin sistematiko sa pagmanehar kan mga rekursos arog sa paggibo nin mga tinampo asin eskwelahan buda magkrear nin mga alternatibong piggikanan nin enerhiya kun saen sa siring na paagi masasalbar an kinaban.

Matapos an workshop, nagpili an kaboronyogan nin magigin representante para sa National Interfaith Dialogue on Climate Change para dagos nang tungkusan an climate change agenda kan gobyerno.

Broadcast Release: November 17, 2014