DENR Nagtagama Nin Pondo Para Sa Mga Protected Area

Lalo pang mapapakusog an kampanya para sa pagbibirik kan biodiversity loss o an pagkakawara kan manlaen-laen na buhay-kadlagan sa pilipinas kasunod kan pagpirma nin Joint Circular sa pag-ultanan kan Department of Environment and Natural Resources (D-E-N-R) asin Department of Budget and Management (D-B-M) sa paglalaen kan dakulang parte kan ganansya sa Protected Area (P-A) para matagamahan nin pondo an mga lakdang pangka-uswagan sa nasabing sektor.

Sinabi ni D-E-N-R Regional Director Gilbert Gonzales na an nasabing kasunduan pinirmahan ninda Environment Sec. Ramon Paje asin Budget Sec. Florencio Abad na may kamawotang i-reinvest an maabot sa 75 porsyento kan gabos na revenue na hale sa Protected Area para sa mga programa asin aktibidad na nagkakanigo sa pangangataman buda pagpaparahay sa mga P-A.

An duwang opisyal nagpirma kan Joint M-C o an implementing guidelines kan R-A 10629 na nagtatagama kan 75 porsyento kan Integrated Protected Area Fund (IPAF) kan Protected Area Management Boards o PAM-B.

Sosog sa J-M-C, magkakaigwa nin insentibo an mga P-A na palangkawon an saindang user fees, mapaparahay asin mapapakusog an Innovative Financing Mechanism dahilan ta magagamit na kan mga PAM-B an saindang nakatagamang rekurso kun kinakaipuhan alagad sa mga paaging silag sa lado kan accounting asin auditing.

Sa bilog na nasyon igwa nin 240 na Protected Area na kompuesto nin mga natural park, magin landscape, siring man wildlife asin marine sanctuaries na minimidbid sa lindong kan National Integrated Protected Area System o NIPAS na minasakop sa maabot sa 5.45 milyon ektarya 0 sobra sa 18 porsyento kan total na nasasakopang daga kan Pilipinas.

Sa Kabikolan igwa nin 17 na Protected Area na may nasasakopang hekwas na  maabot sa 60, 876.79 ektarya, sa kabilogan na bilang, 10 an may kakusgan gikan sa Presidential Proclamation sa lindong kan nipas asin 7 an may initial component.

Broadcast Release: October 20, 2014