DENR Nangapudan Sa Publiko Na Magin Marigmat Sa Illegal Wildlife Trade

Nangangapudan an Department of Environment and Natural Resources sa publiko na magin marigmat laban sa mga krimen may kinaaraman an mga lagalag na linalang kan kadlagan asin tabangan an mga otoridad na puhuon an ilegal na barakalan kaini, na iyo man an pangenot na rason kun kaya luwayluway nang nauubos an mga endangered species. 

Sinabi ni D-E-N-R Bicol Regional Director Gilbert Gonzales na an pangapudan para magin marigmat an publiko kasunod kan magkakasunod na operasyon kan Philippine Operations Group on Ivory and Illegal Wildlife Trade o Task Force POGI, na pinamamayohan kan ahensya. 

Saiyang sinabi na an publiko makakatabang sa kampanya laban sa illegal wildlife trade sa paagi kan dae pagharubay sa konsumerismo na dulot kan illegal wildlife trade. 

Idinagdag pa niya na an publiko may duwang paagi tanganing makatabang sa kampanya laban sa illegal wildlife trade; ini sa paagi kan pag-osip sa mga suspetsadong iligalista, siring man an pagsayuma na magbakal o magsadiri nin mga ataman na lagalag na hayop gikan sa mga nasabing iligalista.

Enot kaini, an Task Force POGI, sarong composite group na kompuesto nin mga personahe kan D-E-N-R Biodiversity Management Bureau asin mga opisyal kan Phil. National Police asin National Bureau of Invesigation - nakadakop nin duwang suspetsado na imbwelto sa illegal wildlife trade na nagsusuhay sa republic act no. 9147 o an Wildlife Resources Conservation and Protection Act.

Sa nasabing operasyon nasalbar kan task force an 60 bayong kairiba an endangered na Phil. cockatoo o inaapud na abukay sa bikol asin sarong brahminy kite o lawin, sarong klase nin banog.

Sa lindong kan leye, an pagrugaring nin endangered wildlife species sarong otomatikong krimen na may padusang pagkakakulong nin sundo duwang taon asin multa na dae malabi sa 20,000 sagkud 200,000 pesos. Mantang an pagkakaimbwelto sa illegal wildlife trade may padusang duwang taon na pagkakakulong asin man multa na 2,000 sagkud 200,000 pesos.

Broadcast Release: October 28, 2014