DENR Bicol, Phil. Navy, SCUBA divers nagsagibo nin underwater clean-up

Sarong mahiwasan na underwater clean-up an isinagibo kan Department of Environment and Natural Resources (D-E-N-R) Bicol, Phil. Navy – Naval Forces Southern Luzon (NAVFORSOL), Bicol SCUBA Divers Foundation, Incorporated asin lokal na gobyerno kan Sto. Domingo kasoodma, Setyembre 28, 2014 sa fish sanctuary kan nasabing lugar.

Sinabi ni Regional Director Gilbert Gonzales na an aktibidad katakod man kan obserbasyon kan bulan nin Setyembre bilang National Clean Up Month asin International Coastal Clean Up Day na parte kan taunan na pakikisumaro kan Pilipinas sa sarabayan na paglilinig kan mga baybayon asin iba pang agihan nin tubig.

Maabot sa 80 divers o paraboso hale sa B-S-D-F-I, D-E-N-R asin Phil. Navy an nagtarabang para linigon an santwaryo kan sira sa mga crown of thorns o an inaapud na lapa-lapa buda mga basura na yaun sa mga bahura.

Sa datos kan D-E-N-R, an nakuang C-O-T ay 163 mantang kadakul na man-iba-ibang klase nin basura gikan sa plastic, goma pati na diaper an nadukayan sa santwaryo.

Saiyang paliwanag sinabi ni R-D Gonzales, na an polusyon sa kadagatan dakula an negatibong epekto sa kapalibutan kalidad kan tubig, lalo na sa biological diversity kan mga nilalang sa dagat, sa mga tawo, asin sa aspeto kan ekonomiya.

Inomaw man ni R-D Gonzales an Phil. Navy sa pamamayo ni Commodore Franco Sebastian pan na nagpasubli kan mga rubber inflatable boats asin mga personahe gikan sa Navy Special Operations Group, an mga miyembro kan B-D-S-F-I, asin an lokal na gobyerno kan Sto. Domingo sa pamamayo ni Alkalde Herbie Aguas.

Broadcast Release: September 29, 2014