DENR, PIA Malunsar Kan Climate Change Adaptation Campaign Ngonyan Na Bulan

Sa kamawotan na mas mapakusog an kampanyan kan gobyerno sa Climate Change Adaptation, mag-aanduyugan an Departrment of Environment and Natural Resources (D-E-N-R) Bicol buda an Phil. Information Agency (P-I-A) para sa paglunsar kan C-C-A program sa rehiyon sa Convention Center kan Provincial Capitol sa Pili, Camarines Sur sa maabot na Agosto 26, 2014.

Sinabi ni DENR Bicol Regional Director Gilbert Gonzales na an nasabing adbokasiya may katoyohan na palumuyon an kawaran pakiaram kan publiko sa isyu kan climate change sa paagi kan strategic communication asin social mobilization.

Tinawan nin doon ni R-D Gonzales na an kampanya nakatakod sa pagbabagong ugali o behavior change para makisumaro an lambang namamanwaan sa adbokasiya para tawan solusyon an pag-abay kan mga inisyatiba sosog sa pagbabago kan klima.

Sa saiyang pahayag, importante an papel kan lambang namamanwaan para sa ikakatrayumpo kan nasabing adbokasiya dahilan ta magigin burugkos an hiro kan gobyerno sa paglaban sa mga problema na kinakahampang kan kapalibutan.

Tampok sa paglunsar an pagtao nin mensahe kan Climate Change Ambassador kan pilipinas na si Gov. Miguel Luis “Migz” Villafuerte kan Camarines Sur.

Kan naka-aging Hulyo 18, 2014 kan inilunsar an kampanya ni Environment Sec. Ramon Paje asin Secretary Herminio Coloma kan Presidential Communications Operations Office o P-C-O-O.

Broadcast Release: August 18, 2014