DENR, pangengenotan an pagtanom nin kahoy katakod kan Arbor Day

An Department of Environment and Natural Resources (D-E-N-R) katuwang an mga stakeholder sa iba-ibang sektor magkakaigwa nin mahiwasang pagtatanom nin kahoy katakod kan pagselebra kan Arbor Day sa maabot na Hunyo 25, 2014.

Sinabi ni D-E-N-R Bicol Regional Director Gilbert Gonzales, na piglalaoman an pagdagsa kan mga partisipante asin magturuwang para maitanom an mga banhi sa pamitisan kan bulkan mayon partikularmente sa barangay Lidong, Sto. Domingo, Albay.

Tinawan nin doon ni Dir. Gonzales na an nasabing aktibidad sarong paagi nin pagsadol sa publiko na makisumaro sa inisyatiba kan gopbyerno na liwat patamboon an mga poon nin kahoy sa mga kabubuldan.

Ipinahayag niya na an nasabing lugar parte na kan mga sityo na sakop kan National Greening Program o N-G-P, na an kamawotan iyo an makapagtanom nin 1.5 bilyones na kahoy sa 1.5 milyones na mga ektarya nin daga sa nasyon.

Kan naka-aging taon maabot sa 2,000 na seedlings an itinanom katakod kan parehas na okasyon na pinartisiparan man nin maabot sa 400 na volunteers.

Segon kay RD Gonzales, an Arbor Day, may kakusgan sa lindong kan proclamation no. 643 kun saen pig-eenganyar an mga ahensya kan gobyerno, kaiba an mga government owned and controlled corporations, pribadong sektor, mga eskwelahan, mga grupong sibiko asin mga namamanwaan na makisumaro sa pagtatanom kada Hunyo 25 taun-taon.

Broadcast Release: June 17, 2014