EMB naglunsar kan pangaduwang fun mural painting para sa kapalibutan

Tanganing maisadol an halaga kan kapalibutan sa publiko, nagsagibo nin pangaduwang fun mural painting an Department of Environment and Natural Resources sa paagi kan Environmental Management Bureau kan naka aging ado, Hunyo 14, 2014.

Sinabi ni E-M-B Regional Director Roberto Sheen na an nasabing pagpipinta kan mga estudyante sarong paagi tanganing matungkusan an kaaraman manongod sa kapalibutan buda maipromotir an talento kan mga kahobenesan sa artes. 

Onse (11) na eskwelahan sa sekondarya an nag-entra sa fun mural painting na kun saen lambang grupo nagkurit nin ladawan sosog sa temang “raise your voice, not the sea level” katakod kan selebrasyon kan Environment Month ngonyan na bulan na Hunyo. 

Lambang partisipanteng eskwelahan tinawan nin pakunswelong gift certificate na kantidad sangribong (1000) pesos gikan sa Phil. Geothermal Production Corp. Kan Tiwi, Albay. 

Sa saiyang pahayag, sinabi pa ni Dir. Sheen na an nasabing mga mural manongod sa environmental awareness maserbeng materyal sa pagtutukdo sa publiko kan halaga kan kapalibutan asin pangangataman kaini.

Broadcast Release: June 16, 2014