Palihang Saringaya nagpoon nang mag-ako nin nominasyon

Bukas na asin dagos an pag-ako ki nominasyon an Department of Environment and Natural Resources (D-E-N-R) Bicol para sa palihang Saringaya ngonyan na taon, kun saen pigtatawan nin pagranga an mga persona saka grupo na nagmamakulog dangan nangangataman sa kapalibutan.

Sa ika katorse (14) taon ngonyan, an Saringaya Awards iyo an itinatao sa mga industriya, Non-Government Organizations (N-G-O), People Organization, Local Government Units (L-G-U), mga kaboronyogan o asosasyon, ibang ahencia kan gobyerno, akademya sagkod iba pang grupo sa Kabikolan na bilang kaboronyogan, korporasyon o persona iyo an nagsusuporta sa mga programa kan D-E-N-R Bicol.

Sa paagi kan implementasyon buda pagbayabay kan mga programa na may katoyohan sa pagbantay, pangataman asin kaligtasan kan kapalibutan.

Segon kay D-E-N-R Regional Director Gilbert Gonzales, ma-ako pa nin nominasyon an mga sanga o yunit kan ahencia arog kan Line Bureaus, Sectoral Services, PENROs buda CENROs sundo sa masunod na bulan nin Hunyo.

Enot nang pinag-ordenan kan Director an mga naunambitang sanga kan opisina rehiyonal na pag-adalan an mga nagkakanigong i-ubay sa nomramiento sa palihan.

An Saringaya sarong terminong Bikolnon na an boot sabihon iyo an pagtalubo, paglangubo asin marahayrahay na kapalibutan na supay nin Biodiversity o Buhay-Kadlagan sagkod na sa balanseng ecosystem.

Broadcast Release: May 16, 2014