DENR Bicol Naggagamit Nin Pangenot Na Teknolohiya Sa Pag-Monitor Ki Reforestation

An Department of Environment and Natural Resources o D-E-N-R naggagamit nin poderosong teknolohiya na inaapud na geo-tagging sa pagpapa-otob kan pangenot na programa sa reforestation.

Sinabi ni D-E-N-R Bicol Regional Executive Director Gilbert Gonzales na presenteng piggagamit na kan opisina rehiyonal an geo-tagging system sa pagsiyasat kan progreso kan National Greening Program o N-G-P, na may katoyohan na matanuman an 1.5 milyon ektarya nin daga poon taon 2011 sagkod 2016.

Sa saiyang pahayag, sinabi ni RED Gonzales na an paggamit nin geo-tagging sa N-G-P mas maseseguro an integredad asin katotoohan kan mga akomplisimiento na pinagre-report, lalo na an pagkabuhay buda pagtalubo kan mga tinanom na poon. 

An geo-tagging sarong proceso kan pagtatakod nin coordinates buda iba pang ispesipikong datos sa mga ladawan asin video, sa mga handheld device o camera o mobile phone na nakakapagpagana kan global positioning system o G-P-S. 

Segon kay Director Gonzales, malinaw an kasugoan ni Environment Secretary Ramon Paje na an N-G-P accomplishment, masayon sana an pagsubaybay bako sana kan manehamiento kan ahensya kundi magin an publiko sa paagi kan internet sa pagbisita sa http://ngp.denr.gov.ph/. 

Kasabay kan katugunan, an gabos na report kaipuhan notaryado nin abogado bago an pagpasa sa D-E-N-R central office para sa paninimbagan kan mga opisyal kan ahensiya sa kaseguradohan kan saindang mga report.

Broadcast Release: April 10, 2014