DENR Inomaw An Nagdadakulang Kaaraman Sa Pangangataman Kan Kadlagan

Inomaw ni Environment Sec. Ramon Paje bilang bentaheng kaaraman sa lado kan pagpalakaw kan kadlagan an nagdadakulang pagmidbid sa papel kan mga kadlagan sa pagseguro kan progreso sa lado sociedad asin ekonomiya. 

Ini an tinawan nin doon ni Sec. Paje sa selebrasyon ngonyan na aldaw (Marso 21) kan International Day of Forests na proklamado kan United Nations General Assembly. 

Saiyang sinabi na nakikisumaro an Pilipinas sa United Nations sa International Day of Forests, sa rason na nagtatao ini nin pagkakataon para pag-atid-atidon kan mga namamanwaan an mahalagang papel kan mga kadlagan sa satuyang historya dangan aspeto sosyal, pangkapalibutan asin pang-ekonomiyang karahayan. 

Idinagdag pa niya na an Pilipinas  sarong ehemplo sa kinaban kan siring na global trend sa paagi kan paglunsar ni Presidente Aquino kan taon 2011 kan National Greening Program (N-G-P) bilang pangenot na programa kan D-E-N-R kaibanan an pagpapa-otob kan logging ban sa mga natural asin residual o natatadang kadlagan sa enterong nasyon.

 

Ipinaliwanag ni Sec. Paje na an N-G-P, na kun saen an katoyohan iyo an pagtatanom sa 1.5 milyon na ektarya nin daga nin 1.5 bilyon na mga poon nin kahoy sundo sa taon 2016, nagkontrebwer nin orog kadakula sa biodiversity conservation bako sana sa pilipinas kundi magin man sa enterong kinaban. 

Laen pa sa papel kan mga kadlagan sa pagbaskog mga lakdang kan pag-andam  climate change asin pagpangataman sa biodiversity, an mga kadlagan sa kabilogan minakontrebwer sa progreso kan nasyon bilang pinagkukuanan nin kalakal pangkomersyo.

An mga kadlagan an pinagkukuanan nin mga materyal para sa industriya, para sa export asin import substitution sa pormang kahoy, hibla, naprosesong produkto, enerhiya asin manlaen-laen na medicinal, ornamental dangan special forest products.   

Broadcast Release: March 21, 2014