DENR Tinungkusan An Koneksyon Kan Tubig Buda Enerhiya Sa Selebrasyon Kan World Water Day Ngonyan Na Taon

Papagsaroon kan Department of Environment and Natural Resources an sektor kan tubig saka enerhiya tanganing mapalangkaw an kaaraman kan publiko sa koneksyon kan pagkonsumo nin tubig asin enerhiya sa tahaw kan selebrasyon kan World Water Day sa Marso 22.

Tinawan nin doon ni Environment Sec. Ramon Paje na an nasabing selebrasyon may temang "water is power" nakatotok sa nagdadakulang kaaraman na an pagtitipid nin tubig posibleng saro sa mga pinaka epektibong paagi tanganing makatipid nin enerhiya - buda vice-versa.

Saiyang sinabi na dulong nakadepende sa kada saro an tubig asin enerhiya, sa pagdodoon na an paghimong enerhiya naggagamit ki tubig, buda an paghimo nin tubig-inumon naggagamit ki enerhiya.

Ipinaliwanag ni Sec. Paje na laen sa isyu pagtatao nin malinig na tubig-inumon sa mga pilipino asin elektrisidad, an may husay na paggamit kan tubig buda enerhiya sarong mahalagang isyu na muyang solusyonan kan gobyerno.

Tanganing maharubay an W-W-D 2014, an D-E-N-R buda mga ka-alyadong ahensya asin mga stakeholder naghanda nin sarong semanang programa poon Marso 17-sundo-22.

         Sa kabikolan, magkakaigwa nin konsyerto an D-E-N-R Bicol na pangengenotan kan Environmental Management Bureau o E-M-B na inapud na selfie o "sing-along, be entertained, laugh and fall in love with the environment" sa Marso 22 alas-4 nin hapon sa Embarcadero, syudad nin Legazpi.     

Broadcast Releases: March 20, 2014