DENR Bicol, PIA Magtatabangan Sa Kampanya Sa Climate Change Mitigation And Adaptation

Poon sa masunod na taon, magtatabangan an Department of Environment and Natural Resources (D-E-N-R-) Bicol asin an Phil. Information Agency (P-I-A) para sa dulong pinakusog na kampanya sa Climate Change Adaptation and Mitigation. Ini kasunod kan pinirmahan na kasunduan o M-O-A sa pagultanan kan D-E-N-R buda P-I-A para sa nasambit na lakdang kan naka-aging bulan.

Sa lindong kan kasunduan, an P-I-A an maharubay buda matabang sa D-E-N-R Bicol sa paghaman kan plano para sa mahiwasang kampanya sa Climate Change Adaptation and Mitigation, kabilang na an komprehensibong media plan, siring man an paghimo nin mga I-E-C material.

Laen pa digdi an pagmukna asin pagpakusog nin mga kaburunyogan kan mga hobenes sa paagi nin mga campus tour asin community fora sa manlaen-laen na lugar sa rehiyon.

Mantang, an D-E-N-R an matao nin nagkakanigong pondo para sa implementasyon kan programa pati man an mga materyal asin tawohan teknikal sa pagpa-otob kan kampanya siring man an pagmansay kan implementasyon kan gabos na mga aktibidad sa lindong kan MOA.

Sinabi ni Regional Executive Director Gilbert Gonzales, na nadadapat sana an mahiwasang kampanya sa Climate Change Adaptation and Mitigation sa hampang kan sunod-sunod na kalamidad na inatubang kan nasyon ngonyan na taon tanganing matawan armas nin kadunongan an publiko para digdi.

Broadcast Release: December 26, 2013