DENR ERDS Mahigot An Pagbantay Sa Mga Namuknang Seed Production Areas

An Department of Environment and Natural Resources (D-E-N-R) Bicol sa paagi kan Ecosystem Research and Development Service o E-R-D-S padagos an pagbantay sa kamogtakan kan mga namuknang Seed Production Areas (S-P-A) sa kabikolan.

Sinabi ni D-E-N-R Bicol Regional Executive Director Gilbert Gonzales na sa pakipagtabangan kan Ecosystem Research and Development Bureau (E-R-D-B) an mga tawohan kan E-R-D-S nagsagibo nin pagtugaygay saka pag-aaram kan naka aging  duwang semana sa mga S-P-A.

Tinawan nin doon ni Director Gonzales na an siring na lakdang may kamawotan na mabantayan progreso kan mga S-P-A siring man an mga inaapud na plus trees o an mga poon nin kahoy na primera klase na iyo man an pagkukuanan nin banhi sa ngapit na aldaw tanganing masiguro an halangkaw na tsansa nin pagkabuhay kan mga tambo kaini.

Apat (4) na S-P-A sites an binisita kan grupo sa Damacan, Bacacay, Albay; Prieto Diaz, Sorsogon; Olas, Lagonoy, Camarines Sur; Dangan Guisican, Labo, Camarines Norte.

Kasabay kaini pinag-dokumento man kan mga tawohan kan E-R-D-S an mga plus trees sa nasambitan na mga lugar.

Broadcast Release: August 1, 2013