Banog, Mga Ukay Pinabuhian Sa Kadlagan Kan Bacman

Pinangenotan ni Albay Gov. Joey Salceda an pagpabuhi sa sarong  banog (serpent eagle) buda onse (11) na ukay (Philippine Cynomolgus Macaque) kan Albay Parks and Wildlife (APW) sa kadlagan kan Bacman katakod kan Environment Month ngonyan na bulan ni Hunyo.

An nasabing pagpabuhi kan petsa 11 sarong lakdang tanganing maibalik giraray an nasabing mga hayop sa saindang natural na erokan. Sinabi ni Gov. Salceda na an siring na lakdang sarong kamawotan kan A-P-W bilang Wildlife and Rescue Center kun saen pinapangatamanan an mga hayop tanganing mibalik sa saindang eerokan pag-abot kan aldaw.

Nagkakapirang mga opisyales kan gobyerno, mga grupong sibiko asin mga taga-prensa an nagpartisipar sa aktibidad na pinadrinohan kan Energy Development Corporation bilang pagsadol sa selebrasyon kan bulan nin kapalibutan.

Kasabay kaini, tinawan nin doon ni D-E-N-R Regional Executive Director Gilbert Gonzales na padagos an pakikipagtabangan kan departamento sa paagi kan Protected Area and Wildlife Sector (PAWD) sa A-P-W sa pagsasapod saka pangataman kan mga buhay-layas para pagdanayon sinda.

Broadcast Release: June 14, 2013