DENR Matrayumpong Isinagibo An Biodiversity Race

Sa okasyon kan World Environment Day, matrayumpo an ipinagsagibong 3rdRegional Biodiversity Challenge kan Department of Environment and Natural Resources (D-E-N-R) Bicol sa syudad kan Masbate kan Hunyo 5, 2013.

An nasabing aktibidad may kamawotan na isadol an kahalagahan kan kapalibutan sa publiko lalo na sa mga partisipante hale sa man-iba-ibang sektor. Sa pahayag ni Forester Aldrin Barruga, Race Director sinabi kaini na sa paagi kan pagbugtak kan mga kaentra sa mga importanteng trabaho kan ahensya arog kan pag-dadakop ki mga tayong, pagpa-potting, pagkamada ki mga banhi, pagbanwit nin sira siring man pagpahayag nin impormasyon sa publiko mas masasabutan ninda an importansya kan papel kan D-E-N-R sa pangangataman kan kapalibutan.

Nagkapira sa mga hagyat iyo an pagdalagan, paglangoy, pagsisid dangan pagkua nin tayong (crown of thorns), pagtanom nin kahoy, pagbugtak nin baybay sa sisidlan, pagkamada nin mga banhi asin an pagbariwas nin impormasyon unong sa National Greening Program o N-G-P.

Matapos an iba-ibang aktibidad nin patiribayan, nagin matrayumpo an Dr. Emilio B. Espinosa Sr. Memorial State College of Agriculture and Technology, na iyo an kampeon, mantang an D-E-N-R Forest Management Ice (F-M-S) an pang-duwa asin an Team Torrecampo, Almonte Balladolid an pangtolo. An mga grupo nakakua nin premyong 10,000 pesos, 7,000 pesos buda 5,000 pesos segon sa pasunod-sunod.

Tinawan nin doon ni D-E-N-R Bicol RED Gonzales na an daeng kaarog na patiribayan sarong patunay na dawa masakit an mga hagyat kada aktibidad, kadakul pa man giraray an muya na magbale tangani maka-eksperyensya sinda kan mga pig-gigibo kan mga tawohan kan ahensya.

Broadcast Release: June 7, 2013