DENR Naghahanda Na Sa Environment Month

Sa tahaw kan ngapit na paggiromdom kan environment month sa bulan nin Hunyo, an Department Of Environment And Natural Resources (D-E-N-R) Bicol pigbiklad na an serye nin mga aktibidad para sa selebrasyon.

Sinabi ni D-E-N-R Bicol Regional Executive Director Gilbert Gonzales na an katoyohan kan pagsagibo kan sarong bulan na pagromdom iyo an pagsadol sa publiko kan halaga kan kapalibutan saka pangangaipo na pangatamanan ini.

Segon kay Director Gonzales, nagkapira sa mga darakulang aktibidad iyo an biodiversity challenge, pariya saka patiribayan kan manlaenlaen na sektor sa Hunyo 5 na gigibuhon sa syudad kan Masbate;  porum manongod sa toxic chemicals buda hazardous waste sa Hunyo 7; D-E-N-R family day sa petsa 10; mural painting contest entri kan mga hobenes na gigibuhon sa syudad kan Legazpi; linig salog sa petsa 15 na isasagibo sa anom na probinsiya; bantay tambutso o an pagsita sa mga smoke-belchers sa Hunyo 18-19;  environment ramp o pagrampa nin mga modelo na sulot an mga recycled materials sa petsa 21; arbor day o an aldaw kan mga kakahoyan sa petsa 22; dangan an tampok kan selebrasyon an saringaya awards saka eagle quiz contest finals sa ika 28 kan masunod na bulan.

Tinawan nin doon ni RED Gonzales na mahalagang romdomon an nasambit na selebrasyon dangan tawan nin inorabuena an mga tawo, institusyon buda mga sibikong grupo na nagmakulog sa kapalibutan siring man an mahiling an mga kapag-arakian na ibiklad an saindang dunong sa eagle quiz contest.

Kasunod kaini, inenganyar kan pamayo kan D-E-N-R Bicol an publiko na makisumaro sa environment month sa paagi kan pakipagkoordinar sa mga PENRO saka CENRO sa saindang mga lugar.

Broadcast Release: May 14, 2013