DENR - ERDS Pinag-Aadalan Na An Propuestong Bambusetum Na Imumukna Sa Ligao City

An D-E-N-R nagsagibo nin pag-aadal asin pagtaong marka sa propuestong lugar para sa Bambusetum  sa Bgy. Bonga, syudad nin Ligao. An Bambusetum sarong lugar kun saen manlaen laen na klase nin kawayan o botong an pinapadakol tangani igwa nin tolos na makukuahan ki pananom o tangani igwa ki pwedeng ipahiling sa boot makanood manongod digdi.

Sinabi ni D-E-N-R Regional Executive Director Gilbert Gonzales na an Research Service kan ahensya  an mamukna kan bambusetum sa nasabing syudad. Sa pangenot ni Technology Transfer Division Chief Lida Borboran, pinag adalan kan grupo an nasabing lugar.

Sosog sa impormasyon, igwang Demonstration Farm para sa bambusetum sa E-R-D-S kun saen 21 klase ki kawayan hale sa ibang nasyon ( o exotic) buda mga kawayan na digdi sana makukua sa pilipinas ( o endemic) an napatambo na. Ngonyan igwa nin 354 taldok nin kawayan an pinapatambo asin pigmamantini sa nursery kan DENR Research mantang padagos man an produksyon nin bagong pananom o  planting stock.

Idinagdag pa ni Gonzales na an pagmukna kan bambusetum sarong pagtatabangan kan D-E-N-R asin kan gobyerno lokal kan Ligao na nag andurog nganing makamtan an mapusog na programa tumang  sa pag-alaman dulot kan pagbago kan klima, turismo asin pagpatalubo pa kan lokal na ekonomiya na naka angkla sa  agrikultura.

Broadcast Release: April 26, 2013