10 Toneladang Abonong Mycorrhiza Itatalaan Kan DENR Sa Kabikolan

Tanganing masiguro an halangkaw na porsyento nin pagtambo kan mga poon nin kahoy na itinanom sa lindong kan National Greening Program, matalaan nin sampolong (10) toneladang abono an Department Of Environment And Natural Resources (D-E-N-R) sa kabikolan.

Ini an tinawan nin punto ni D-E-N-R Bicol Regional Executive Director Gilbert Gonzales, kasunod kan asegurasyon kan Ecosystems Research And Development Bureau o E-R-D-B na makakagono sinda ngonyan na semestre nin 155 toneladang abono o mas halangkaw na 55 porysento kompara kan nakalihis na taon.

Sinabi ni RED Gonzales na an abonong “mycorrhiza” marahay na klase nin biofertilizer na nakakaparikas nin pagdakula kan mga ugat sagkod napapakarhay an pagdadakit nin tubig saka nutrino sa pananom kun kaya nasisiguro an 80 porsyentong paglangubo kan mga banhi.

Sosog sa pag-aadal kan E-R-D-B, an “mycorrhiza” nakakatabang nganing magin matinood an mga pananom sa halawig na durasyon nin tagmara magin sa epekto kan mga heavy metals sa lugar na igwa nin mine tailings o tapukan nin tundag kan minahan.

An produksyon kan biofertilizer pinangengenotan kan E-R-D-B sa pakipagtabangan kan National Institute Of Molecular Biology and Bio-Technology kan University Of The Philippines Los Baños (UPLB-Biotech).

Broadcast Release: April 8, 2013