DENR Naghahanda Na Sa Kasulo Sa Kadlagan

Mantang nag-aadang-adang na an tig-initan, pinag-ordenan na ni Environment Sec. Ramon Paje an mga opisyales kan Department Of Environment And Natural Resources (D-E-N-R) na maghanda na nin mga istratehiya saka mag-ampon nin mga lakdang na nakapangbubulong o nakakalikay sa kasulo sa kadlagan.

Kasabay kaini, sinabi ni D-E-N-R Bicol Regional Executive Director Gilbert Gonzales na nagtitimaan naman an pangrehiyonal na opisina sa posibilidad nin kasulo sa kadlagan kun kaya may nakahanda nang mga lakdang para sa pagpuho kaini.

Ipinahayag niya na an ahensya padagos an pagsagibo nin komprehensibong ensayo tanganing matawan kin nagkakanigong kaaraman an mga tauhan sa kadlagan sa epektibong pagpuho nin kasulo. Laen pa na an katugonan para sa imbentaryo sa mga ekipahe saka kaaraman sa pagpuho nin kasulo kan mga tauhan sa kabubuldan.

Tinawan nin punto ni Gonzales an mga isasagibong lakdang kan opisina siring kan pagmamansay sa mga piglalanganan na lugar (Protected Areas) sa posibilidad na pagkanayap nin kasulo asin sigurohon na may nagkakanigong basyaran kan tubig sa komunidad.

Kaibanan sa mga istratehiya iyo an pagpapusog kan kaaraman sa paglilikay buda pagpuho nin kasulo sa kadlagan kaubay an mga tawo sa komunidad, Bureau Of Fire Protection asin Department Of Interior And Local Government. Pagtiktik sa mga kaingin saka bawal na pagsulo sa mga kaawagan, pagtugdok nin istrakturang masagop nin tubig, pagtalaan nin fire lines o katad nin kasulo dangan an pagtukdo sa mga komunidad sa pagpuho nin kasulo.

Broadcast Release: March 26, 2013