SCUBAsurero Tinungkusan An Pagromdom Sa World Water Day

Sarong paglilinig sa baybayon saka bahura kan syudad nin Legazpi an isinagibo kan Environmental Management Bureau – sanga kan D-E-N-R kaandurog an manlaen-laen na sektor bilang pagromdom sa World Water Day ngonyan na aldaw.

Ipinahayag ni E-M-B Regional Director Roberto Sheen na an nasambit na aktibidad mawot isadol an dakulang papel kan basura sa pagroro kan kalidad kan tubig.

Tinawan nin doon ni R-D Sheen na sa sarabayang pagrilinis kan baybayon buda bahura mamumuklat kaini an kinabatiran kan publiko na likayan an basang na pagtatapok ki basura sa mga salog o dawa sa mga natad dahil an padumanan kaini iyo an kadagatan mismo.

Maabot sa trenta (30) na mga scuba diver kan Phil. Coast Guard, Bicol Scuba Divers Foundation Inc., saka D-E-N-R an nagbuso sa Albay Gulf, mantang 120 an nagrilinig sa daragsaan kan barangay dapdap sa nasabing aktibidad.

An World Water Day, taun-taon pigtatandaan nganing maipahayag an halaga kan malinig na tubig sa mga komunidad kan kinaban.

Broadcast Release: March 22, 2013