Plano Tanganing Mapakusog An Proteksyon Kan Bicol Natural Park Ibibiklad Kan DENR

Pighihimo na kan Department Of Environment And Natural Resources Bicol an komprehensibong istratehiya nganing mapakusog an proteksyon kan Bicol Natural Park o B-N-P sa Ambos Camarines.

Tinawan nin doon ni D-E-N-R Regional Executive Director Gilbert Gonzales na an mga lakdang iyo an mataong solusyon sa mga problema na kinakahampang kan protected area siring man maiharayo sa dagos-dagos na pagroro an kamugtakan kaini.

Kaiba sa mga lakdang iyo an pagpakusog kan mga tauhan kan Protected Area; pagmansay sa kamugtakan kan mga kaso kontra sa mga poachers saka mga iligal na squatter; pagkondukta nin paralegal workshop sa mga tauhan kan P-A; pagsadol kan National Integrated Protected Areas System (Nipas) sa paagi nin pagtiripon; tarabang na palakaw kan kadlagan kaubay an mga gobyerno lokal; pagtaong poder sa mga Peoples Organization dangan an pagtatao nin permiso sa paggamit kan mga rekurso kan bukid asin an istriktong implementasyon sa pagbabawal sa pag-ooring sa lugar sa paagi kan pagbantay dangan dae pagtatao ki permiso.

Tinawan nin doon ni RED Gonzales na an nasambit na mga lakdang an makakasiguro na an B-N-P dulong mapapangatamanan.

Tinugon man niya si Protected Areas Wildlife And Coastal Zone Management Service (PAWCZMS) Regional Technical Director Felix Mendoza na pag-adalan nin hararom an mga plano mantang sinugo an mga PENRO na pakusogon an pag-patrolya saka chekpoint.

Broadcast Release: March 18, 2013