Pidal Para Sa Malinig Na Paros Nagin Matrayumpo

Nagin makolor asin matrayumpo an katatapos pa sanang aktibidad na “pidal para sa malinig na paros” kan Department of Environment and Natural Resources (D-E-N-R) sa paagi kan Environmental Management Bureau (E-M-B).

Ginatos na parabisikleta gikan sa manlaen-laen na sektor an nakisumaro sa piridalan na linibot an sentro kan syudad nin Legazpi kun saen nagpoon saka nagtapos sa parke kan Peñaranda.

Sinabi ni D-E-N-R Regional Executive Director Gilbert Gonzales na an siring na aktibidad may katoyohan na imuklat an kinabatiran kan publiko manonongod sa iba-ibang alternatibong klase nin transportasyon siring kan bisikleta tanganing matakrasan an carbon emission na dulot kan mga awto.

Tinawan nin punto ni Gonzales na mantang marhay na kalidad nin paros an yaon sa kabikolan kompara sa ibang mga lugar sa nasyon, kaipuhan man giraray na magin muklat an mga tawo sa reyalidad kan climate change, na pinapakusog kan carbon emission.

Idinagdag pa niya na instrumento man an kaaraman kan publiko tanganing magin matrayumpo an mga programa kan gobyerno sa pagpabansay kan kalidad nin paros, siring man an pag-andam sa epekto kan climate change.

An bulan nin Nobyembre pigseselebrar na Clean Air Month buda Climate Change Awareness Week.

Broadcast Release: November 20, 2012