Pagmukna Nin Bambusetum Pinagbubusol Kan DENR Bicol

Sa katoyohan na mapangatamanan saka mapadakul, pighihimo na kan Department Of Environment And Natural Resources (D-E-N-R) Bicol sa paagi kan Ecosystem Research And Development Service o E-R-D-S an Proposal Paper para sa pagmukna nin bambusetum o lugar nin pag-aadal sa kawayan o botong sa rehiyon.

Sosog sa impormasyon, an siring na lakdang sarong pagtarabangan entri kan E-R-D-S buda gobyerno lokal kan syudad nin Ligao sa paagi kan Environment And Natural Resources Office o ENRO kaini.

An pagmumukna nin bambusetum maserbeng genebank o basyaran nin banhi kan exotic saka indigenous species nin botong/kawayan asin lugar nin pag-aadal para sa pagpalangubo kaini.

Pigkokonsedera man an botong na saro sa mabansay na klase ki poon nin kahoy na pang-komersyo dara kan kadakul kaining gamit asin pangangaipo sa lokal asin internasyonal na mercado.

Sa ngonyan igwa na nin dese seis (16) na species nin botong/kawayan hale sa E-R-D-B saka lokal na pigkuanan an nasa pagsasaray kan E-R-D-S.

An naunambitang proyekto imumukna sa Kawa-Kawa, syudad nin Ligao.

 

Broadcast Release: October 9, 2012