Legazpi City, 5 na LGU Nagpirma Nin Moa Sa Pagtabas Nin Dioxins, Furans Emission Hale Sa Basura

Sa lakdang na matakrasan an emission o pag-aso nin dae tuyong Persistent Organic Pollutants gikan sa basura, an Department Of Environment And Natural Resources o D-E-N-R nakipagkasundo sa anom na gobyerno lokal o L-G-U kan Oktubre 4, 2012 para sa pagdayon ninda sa isinasagibong Integrated Persistent Organic Pollutants Project o I-Pops.

An mga hepe ehekutibo na nagpirma nin kasunduan kay Environment Sec. Ramon Paje iyo sinda Alkalde Geraldine Rosal kan Legazpi City; Ferdinand Amante Jr. kan Butuan; Evelio Leonardia kan Bacolod City saka Julio Cezar Vergara kan Cabanatuan City. Mantang sinda Alkalde Darlene Antonino-Custodio kan General Santos City saka Jed Patrick mabilog kan Iloilo City dae naka-atendir sa okasyon alagad, dagos an pagpa-otob kan proyekto sa saindang lokalidad.

Sinabi ni Sec. Paje na an nasa tahaw kan magigin trayumpo kan Ipops Project na matakrasan an buga o emission nin dioxins asin furans iyo an mga gobyerno lokal dahilan ta sinda an nasa pangengenot sa implementasyon kan Republic Act 9003 o Ecological Solid Waste Management Act.

Sa lindong kan kasunduan, an pangenot na responsibilidad kan L-G-U iyo an pagpondo kan pagsusulo nin basura sa mga dumpsite saka  pag-irahay digdi dangan pagbubusol kan operasyon nin land fill. Dangan piglalaoman pang i-uusol man kan mga L-G-U an pagbabawal kan “Open Burning” o pagsusulo nin basura sa mga komunidad, residencia, natad buda iba pang pampublikong lugar sosog man sa hihimoon nindang komprehensibong action plan.

Makakakua man nin asistencia an mga L-G-U na itataong kwenta kan Ipops Project siring kan disposal window and collection window.

 

Broadcast Release: October 8, 2012