Adopt-An-Estero Marhay Sa Pagsustenir Kan Kalidad Nin Mga Katubigan

“Marhay sa pagsustenir kan kalidad nin mga salog asin estero an Adopt-An-Estero Program kan Department of Environment and Natural Resources (D-E-N-R) kun saen pig-eenganyo kaini an mga pribadong kompaniya buda mga stakeholder na maghiro asin atamanon an mga katubigan sa rehiyon”.

Ini an tinawan nin doon ni Environmental Management Bureau Regional Director Robert Sheen sa ipigsagibong Forum for Partner Industries on Adopt-An-Estero/Waterbody Program ngonyan na aldaw sa syudad nin Legazpi.

Mantang pig-oyonan man ni D-E-N-R Bicol Regional Executive Director Gilbert Gonzales an magayon na katoyohan kan programa sa pagsasabing mas mapapalawig pa kan siring na lakdang an buhay kan mga katubigan sa rehiyon.

Tinawan nin punto ni Dir. Gonzales na maserbeng giya ini sa publiko kun ngata kaipuhan na pangatamanan an mga estero saka salog, apuera pa na nakakatabang ini na mapakusog an kampanya kontra sa pagbabago nin klima.

Hinagad man ni RED Gonzales, sa mga pag-iribang industriya na mas magin agresibo sa paglilinig dangan pangangataman kan mga estero asin salog tanganing mas mamatean tulos kan mga namamanwaan an resulta kan kampanya na dulong makumbinsir sainda na makisumaro logod.

Magigiromdoman, na sa lindong kan liderato ni RED Gonzales sa E-M-B Bicol, ipigsulong niya an Clean Bicol Rivers na iyo an nagserbeng inspirasyon kan Adopt-An-Estero Program.

 

Broadcast Release: September 26, 2012