CENRO VIRAC, CENRO DAET NAKAKUMPISKA NIN SINGKO MIL BOARD FEET NIN LUMBER SA CATANDUANES, CAMARINES NORTE

Padagos an pagbunga kan mas pinakusog na kampanya kontra sa iligal na pagputol nin poon nin kahoy, nakapagkumpiskar nin sobra sa singko mil board feet nin narra saka red lauan flitches/lumber an Community Environment and Natural Resources Office (CENRO) Virac dangan Daet sa pakipagtabangan kan kapupulisan kan banwaan nin Caramoran, Catanduanes asin Mercedez, Camarines Norte kan Hulyo 7 na banggui sagkod Hulyo 20, 2012.

Sosog sa impormasyon ni CENR Officer Luvimindo Chioco, an pinagsarong puersa kan CENRO Virac saka Caramoran P-N-P nakadakop nin 3,180 board feet (bd. ft.) nin narra flitches/lumber sa Brgy. Suparang kan naunambitan na banwaan. Idinagdag pa ni Chioco na dahilan ta madiklom an kabanguihon, nakaipsot an sarong bankang de-motor na may sakay na dae namidbidang mga suspetsados.

Mantang sa report ni CENRO Ponciano Mabeza kan Daet, ipinahayag kaini na sa tabang kan Mercedez P-N-P nakakumpiskar sinda nin 6 na pidaso nin red lauan “banca keel” o kilya na may kabilogang 1,545 bd. ft. siring man 18 pidaso nin red lauan lumber na maabot sa 365 bd. ft kairiba pa digdi an duwang bagong gibong bangkang de motor. An mga kumpiskadong kahoy natuparan sa may daragsaan kan Brgy. Masalong-salong, Mercedez, Camarines Norte.

Basado sa proceso, an mga nakumpiskar na mga lumber/flitches asin kilya iyo an itinaong kwenta sa duwang field offices para sa nagkakanigong disposisyon. Ipinahayag man kan CENRO Daet na an duwang bagong gibong bangkang de motor yaon pa duman sa Brgy. Masalong-salong dahilan kan masakit na pagbitbit kaini.

Mientrastanto, ipigsasagibo naman kan CENRO Virac an Administrative Confiscation Proceedings (A-C-P) para sa naumbitan na mga lumber mantang an CENRO Daet naghahagad nin basbas sa regional para sa pagsubasta sa duwang bangka.

Broadcast Release: July 23, 2012