DENR Bicol Nag-asegurar nin suporta sa Albay Tres Quinali Watershed

Dahilan sa problemang dulot kan labi-labing pagbaha sa ikatolong distrito kan Albay, tinawan nin asegurasyon ni D-E-N-R Regional Executive Director Gilbert C. Gonzales an makusog na pagsuporta sa mga programa saka inisyatiba kan Albay Tres Quinali Watershed Management Project sa ginibong ika-duwang pagtiripon kan konseho kaini ngonyan na aldaw.

Segun kay Director Gonzales, importante na matawan nin nagkakanigong atensyon an pag-pangataman kan Watershed o tinggalan nin tubig tanganing malikayan an negatibong epekto kan mga kalamidad siring man matawan nin dalan an pag-uswag kan ekonomiya sa mga lugar na sakop kaini.

Tinawan nin doon niya na an saro pang mahalaga iyo an pag-aadal sa pwedeng pag-uswag sa ekonomiya na maihahatod kan nasambitan na programa sa mga lugar na sakop kan Watershed.

Sa pagtiripon ipinagtulod kan D-E-N-R an “Integrated ecosystem Management (I-E-M) Framework” na iyo an magigin pundasyon sa pagmanehar kan watershed. Sa naunambitan na I-E-M, piglalatag kaini an mga moda o paagi kon saen mas maprotehiran an Watershed kaubay naman an mga nasasakopan na lugar.

Nagtutubud an pamayo kan D-E-N-R bicol na magigin pusog an maidodolot na akomplisimiento kan Watershed Management Project sa duwang lado, pagpangataman saka proteksyon kan kapalibutan dangan pag-uswag sa ekonomiya dulo na ta agrikultural an mga lugar na nasasakopan kan proyekto.

An Albay Tres Quinali Watershed Management Council Project  iyo an pinapamayohan ni Gov. Joey Salceda kan Albay, na kompuesto kan mga banwaan kan Libon, Polangui, Oas, Guinobatan, Camalig asin syudad nin Ligao.

Broadcast Release: July 11, 2012